Ezagutzaren kudeaketan oinarritutako project management-aren antzea

Zusammenfassung

Praktikan, informazio esplizitua informazio-teknologien bidez integratu baino ez dute egiten enpresa askok ezagutza kudeatzeko; hartara, ordea, espazio digital bat eratzea besterik ez da lortzen, eta espazio horrek berez ez dauka ezagutza sortzea eragingo duen dinamikarik. Gainera, proiektuen barruan ezagutza kudeatzeko ikuspegi global bat definitzea zaila denez, proiektu funtzional independenteak ari dira egiten enpresak, eta proiektu horiek ez dute nahitaez ikuspuntu integratu bat. Hala, ezagutza nola sortu, hobekuntzak nola inplementatu eta ezagutza hori nola integratu arrakastaz proiektuaren prozesuetan ikertzen dute enpresek: prozesu horien kudeaketa egoki antolatzea izango da helburua. Horregatik aztertzen da artikulu honetan ezagutzaren kudeaketak Project Management delakoari egiten dion ekarpena, ez jakintza-arlo bereizi gisa baizik eta elkarri atxikita, antolamenduaren estrategia korporatiboaren barruan koordinatu eta txertatutako ekimen gisa. Horretarako, lehenik, ezagutza sortuta eta proiektuetan arian-arian barneratuta, proiektu-taldean kultura edo gune sozial bat eratzeko dauden hainbat praktika eta teknika aztertuko dira, eta, ondoren, ezagutzaren fluxu multidinamikoa egituratuko duten teknologiak eta simulazio-tresnak landuko dira, antolamendu-ikaskuntzan oinarritzen den enpresa batean proiektuarekin sortutako premiei erantzuteko. Berrikuntzari begirako ikuspuntu horrek ekarriko du ezagutzaren espirala, pixkanaka-pixkanaka aplikatzen eta integratzen joatea, eta, hala, argitara aterako dira, agian, Project Management-aren antzeak dituen zenbait sekretu.